Minjeny tydźeń, 27. januara, su na wopomnišćach po cyłej Němskej na wopory nacionalsocializma spominali. Tak tež na arealu něhdyšeho wonkowneho koncentraciskeho lěhwa Herrental w Kamjencu.

Kamjenc (BG/SN). Na wopomnjenske ­zarjadowanje běštej město Kamjenc a Spěchowanske towarstwo wopomnišćo wonkowne koncentraciske lěhwo Herrental přeprosyłoj. Cyłkownje 200 hosći běše přeprošenje sćěhowało.

Město Kamjenc woswjeći 800. róčnicu swojeho wobstaća w samsnym lěće, w kotrymž woswjećimy w Němskej 80. róčnicu kónca Druheje swětoweje wójny – w času, w kotrymž w Ukrainje, 1 900 kilometrow wuchodnje wot nas, zaso žałostna wójna howri. Nimale 13 000 Ukrainjanow z ciwilneje ludnosće je dotal swoje žiwjenje přisadźiło.