Institut poskićuje inwestoram we Łužiskej jězorinje pomoc

Choćebuz (SN/mb). W runje wušłej knize „99 Zukunftsobjekte aus der Lausitz“ Johannesa Staemmlera, nawody referata Braniborskeje techniskeje uniwersity (BTU) Choćebuz-Zły Komorow za změnu strukturow, je tež Eduard Völker awtor. Wón je sobuzałožer a naměstnik předsydy instituta za płuwace twarjenja (IfSB). Wjac hač 130 serbskich sydlišćow je so w dobje wudobywanja brunicy wotbagrowało. A hdźež bě něhdy serbska zemja, wupřestrěwa so dale a wjac wody – Łužiska jězorina. Tohodla chcychmy wědźeć, hač njemóhli na wodźe zaso serbske wjeski nastać. Wšako je za serbske swójby dale a ćešo, twarsku ležownosć namakać. Haj, tajka ideja, płuwace sydlišća z historiskim pozadkom załožić, je jara powabna, wotmołwi wědomostnik na naprašowanje našeho wječornika.