Brězowka (JoS/SN). Dobrowólnym wohnjowym wobornikam z Brězowki, jich partneram a mnohim hosćom bě sobotu při přepodaću noweje wohnjowoborneje gratownje z wobliča wučitać, zo so z tymle dnjom nowy wotrězk wohnjowobornych stawiznow wsy započnje. Wosebje wjele wobydlerjow je přišło, zo bychu tónle podawk z kameradami woswjećili.
Nimo wjesnjanow a zastupjerjow Swobodneho stata Sakskeje kaž tež Zhorjelskeho wokrjesa běchu tohorunja čłonojo susodnych wohnjowych woborow přišli. Jako prěni pak dźěći pěstowarnje „Baćonjace hnězdo“ swoje postrowy hudźbnje a rejujo sposrědkowachu. Nawoda wobornikow Olaf Hanusch dopominaše na spočatki projekta noweje gratownje. Hižo w lěće 2017 so wo njej prěni raz rozmyslowali. Tehdy bě jasne, zo trjebaja nowotwar, wosebje tohodla, dokelž běštej gratownja a pěstowarnja w samsnym twarjenju zaměstnjenej.
