W rěčnym hnězdźe we Wulkich Zdźarach wuknje bórze jědnaće ludźi

Budyšin (SN/MG). Projekt „Zari“ zahaji přichodnu wutoru, 8. apryla, swój dźewjeć měsacow trajacy intensiwny kurs serbšćiny pod titulom „Domoj“. Podobnje delnjoserbskemu projektej „Zorja“ w Dešnje maja wobdźělnicy w škitanym rěčnym hnězdźe tak w poměrnje krótkim času serbšćinu nawuknyć. Na štyrjoch dnjach kóždy tydźeń chcedźa z dohromady jědnaće wobdźělnikami na najwšelakoriše wašnje a z mnohimi metodami rěč nawuknyć.

Jedyn z hłownych zamołwitych za projekt je nawoda rěčneho kubłanja w projekće „Zari“ Julian Nyča. Wón je přeswědčeny, zo wukubłuja z nowym projektom „sebjewědomych noworěčnikow, kotřiž budu so spěšnje a efektiwnje do serbskeje zjawnosće a zhromadnosće integrować“. W rozmołwje z našim wječornikom rozłožuje wón dale, zo přebywaja wobdźělnicy na nowym Krabatowym wu­dworju w Nowy Zdźarach. Tam wotnaja „Zari“ bróžnju statoka.