Zo so křižowanišćo na kružny wobchad přetwarja, je přeco hišće něšto wosebiteho a dawno njeje samozrozumliwe. Juhowuchodnje Budyšina je so tajki projekt nětko zwoprawdźił.

Sokolca (CS/SN). Kružne wobchady so pozitiwnje na wěstotu w nadróžnym wobchadźe wuskutkuja. Wosebje tam, hdźež su křižowanišća njepřewidne, su wone spomóžne. Pola Sokolcy (Soculahora) křižuja so dróhi ze wsy, dróha do Raboc (Rabitz), puć do Torońcy (Daranitz) a dróha do Lubjenca (Mehltheuer). Nětko je tu kružny wobchad nastał, kiž ma nahladnje wulki přeměr 25 metrow w nutřkownym kole. To ma předewšěm ratarskim jězdźidłam zmóžnić, na njekomplikowane wašnje po kružnym wobchadźe jězdźić. W přitomnosći přirjadowaneje Budyskeho krajneho rady Romy Reinisch a Kubšiskeho wjesnjanosty Olafa Teicherta su tutón tydźeń kružny wobchad zjawnosći přepodali. Z tym je tež wobjězdka za zawrjenu Lubijsku dróhu w Budyšinje wolóžena.