Šulerjo intensiwneho kursa serbšćiny so w rěčnym hnězdźe doma čuja
Wulke Zdźary (SN/MiP). Minjenu wutoru popołdnju na Krabatowym nowym wudworu we Wulkich Zdźarach: Serbske Nowiny su na wopyće w rěčnym hnězdźe intensiwneho kursa hornjoserbšćiny z mjenom „Domoj“, kotryž projekt ZARI lětsa prěni raz dwanaće wobdźělnikam poskićuje. Prěni wot dohromady dźewjeć wuwučowanskich měsacow je nimo. Zaměrnje a połna wjesela zwučuje črjódka kursistow wonka na terasy dźěćacy kanon „We wsy steji rjana lipa zelena. Pčołki po njej zynčo, frunčo lětaja ...“. Čiła je tež atmosfera nutřka w domje. Z rěčnej motiwatorku Raphaelu Wićazowej pjeku někotři šulerjo w kuchni pilnje plincy, tamni warja kofej, druzy kryja blido. Při tym so serbsce rozmołwjeja.
