Slepo (AK/SN). Na originelne a wosebite wašnje dopominaja přichodny kónc tydźenja w Slepom na stawizny swojich cyrkwinskich zwonow. Mały mjedźany zwón nasta před 450 lětami. Nowej wjetšej zwonaj ze železa přichadźeštej před 100 lětami do Slepoho.

Za čas Prěnjeje swětoweje wójny je wjele wosadow w Němskej swoje drohotne mjedźane zwony statej wotedać dyrbjało. Tute zeškrěchu, zo móhli z nich brónje twarić. Tónle wosud poćerpještej tohorunja zwonaj w Slepom. „Na zbožo mały zwón tehdy na cyrkwinskej wěži wostajichu. Wón je w lěće 1575 prěni raz zwonił, potajkim před 450 lětami“, rozprawja wosada w aktualnym hamtskim łopjenje Slepjanskeho zarjadniskeho zjednoćenstwa. Za zebranej zwonaj wosada po wójnje narunanje wobstaraše. Za 3 323 reichsmarkow, štož wotpowěduje dźensa něhdźe 14 000 euram, je firma Schilling & Lattermann w Apoldźe nowej železnej zwonaj zhotowiła. W septembru 1925 wonej na Slepjanske dwórnišćo dojědźeštej. Pokutny dźeń samsneho lěta jej poswjećichu.