Swjedźenski kónc tydźenja składnostnje 800. róčnicy Kamjenca swjećili

Kamjenc (SN/MČ/BG/MiR). Na wšěch 30 000 wopytowarjow je zašły kónc tydźenja w Kamjencu měšćanski swjedźeń dožiwiło. Tule ličbu wyši měšćanosta Roland Dantz (njestronjan) dźensa rano medijam z whatsappku zdźěli. Lessingowe město swjećeše 800. jubilej swojeho prěnjeho naspomnjenja. Měšćanskej barbje, běła a čerwjena, běštej w bohaće wupyšenym Kamjencu wšudźe widźeć. Na štyrjoch jewišćach na Hłownym torhošću, na Šulskim a na Lessingowym naměsće kaž tež při Čerwjenej wěži jewješe so we wuhotowanju serbska runja němskej rěči. Tež wabjenske srědki, kaž programowy zešiwk, běchu dwurěčnje wuhotowane. Mjez poskićowarjemi a akterami na wšelakich milach bě syła Serbow, kaž w kruhu towarstwow, policistow, rjemjeslnikow a wikowarjow.