Zahroda ma so po originalu za čas wuměłca zaso pisanić

Njechorń/Budyšin (SN/LT/MiR). Kruh přećelow doma Měrćina Nowaka-Njechorńskeho wěnuje so wot lětušeje nazymy zahrodźe wokoło domskeho a ateljeja serbskeho wuměłca. „Chcemy zahrodu lětsa tak spřihotować, zo móžemy klětu mjez druhim wšelake rostliny a kwětki sadźeć, kotrež běchu Měrćinej Nowakej a jeho mandźelskej Marće wažne“, rjekny iniciatorka kruha a županka Budyskeje župy „Jan Arnošt Smoler“ Leńka Thomasowa. Wona prosy tuž wšitkich, kotřiž so na to dopominaja, kak bě zahroda něhdy wupadała, wo pomoc. Njech tući ju skontaktuja. „Něhdyša županka Hilža Elina na přikład ma hišće fota a so na zetkanja z Nowakec mandźelskimaj w jeju refugiju dopomina“, tak Thomasowa rjekny. Při tym so wona financielnych srědkow z wubědźowanja Załožby za serbski lud „Rěč zwjazuje“ nadźija.