Budyšin (SN/MWj). Hornjołužiske kliniki su dalši měznik swojeho medicinsko-techniskeho wuwića docpěli. Kaž w nowinskej zdźělence rěka, je Budyska chorownja tele dny roboter z mjenom Da Vinci dóstała. Prjedy hač móža jón wužiwać, maja něhdźe wosom tydźenjow trajace kubłanje zabsolwować, jednaćel Hornjołužiskich klinikow Jörg Scharfenberg rozłoži. 3,9 milionow eurow su za roboter inwestowali. 95 procentow z toho stej Sakska a zwjazkowe ministerstwo za hospodarstwo spěchowałoj.
„Za našu urologisku kliniku je Da Vinci wulki krok do přichoda“, šeflěkar urologiskeje kliniki dr. Aristeidis Zacharis rozłoži. „Wot robotera podpěrana chirurgija zmóžnja při operacijach wulku dokładnosć. Pacienća maja po operaciji mjeńše rany, zhubja mjenje kreje, maja mjenje komplikacijow a so spěšnišo wuhoja, tak zo móža chorownju spěšnišo wopušćić.“
