Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kiž dźewjeć měsacow traje. Dohromady jědnaće wobdźělnikow wuknje zhromadnje w tak mjenowanym rěčnym hnězdźe. W přichodnych tydźenjach jich w našim wječorniku předstajimy. Prěnja je Yana Humenna, kotraž chce młodym Serbam pomhać.
Rěkam Yana Humenna a sym Ukrainjanka. Dźěłam jako rejowarka, choreografka, performerka a dramaturgowka. W Kijewje mějachmy swójske dźiwadło PostPlayLab, kotrež sym ze swojim mužom natwariła. Tam smój 48 hodźin wob dźeń dźěłałoj, zo by dźiwadło financielnje přežiwiło. Sceniske čitanja načasneje dramatiki, zmužite eksperimenty režiserkow, nowe hłosy młodych dramaturgow, interdisciplinarne projekty, pytanje za nowymi formami a woznamami – wšo to a hišće wjele wjace so na jewišću našeho dźiwadła wotměwaše.
