Chróšćanska gmejna wjeseli so lětsa nad wyšimi dochodami
Hórki (JK/SN). Poprawom zetkawa so Chróšćanska gmejnska rada w lěću do prózdninow w Hórkach, zo by prěnje połlěto zarjadniskeho dźěła bilancowała. Lětsa pak běše junij po słowach wjesnjanosty Marka Klimana (CDU) ze zarjadowanjemi kaž z jubilejom gmejny a wosady chětro wuplanowany.
Tohodla zetkachu so radźićelka a radźićeljo wčera w domje wohnjoweje wobory w Hórkach. Tam mějachu składnosć, na zwjeselacu rozprawu komornicy Michaele Jurkoweje wo spjelnjenju lětušeho hospodarskeho plana słuchać. Komornica wozjewi jim dobry staw spjelnjeja kaž tež, zo smě gmejna wyše dochody z přemysłoweho dawka wočakować. Powšitkowne klučowe připokazanki budu wo 13 000 eurow wyše a nastupajo dźěćace dnjowe přebywanišća liča z 31 000 eurami přidatnych dochodow. Hdyž wšitko dale tak derje poběži, změje gmejna prawdźepodobnje cyłkownje 60 000 eurow přidatnych dochodow. To jej na kóždy pad pomha, wažne nadawki spjelnić.
