W zwisku z nowym zakonjom za zadźěwanje nachwilnemu nadbytkej energije (Solarspitzengesetz) chce Sakska energijowa agentura SAENA priwatnym wobsydnikam solarnych připrawow wažne prawniske, hospodarske a techniske pozadki předstajić.

Budyšin (SN/MiP). Dobywanje „swójskeje“ miliny z priwatnej fotowoltaikowej připrawu na swojej třěše, zahrodźe abo na balkonje je trend, wšako sej na tute wašnje tójšto eurow běžnych wudawkow w domjacnosći zalutuješ. Tajka připrawa je tež hladajo na sčasami njestabilne płaćizny za milinu jara atraktiwna. Nimo toho móžeš sej jako priwatny producent tón abo tamny euro přizasłužić, dodawaš-li milinu do milinoweje syće. Njeregulowane dodawanje z priwatnych solarnych připrawow pak móže syć wobškodźić, jeli přewjele miliny naraz do njeje ćeče. Z tuteje přičiny je zwjazkowy parlament lětsa w februaru nowy zakoń za zadźěwanje nachwilnemu nadbytkej energije wobzamknył, kotryž ma tole rjadować. Zakoń pak wuskutkuje so na planowanje, wobhospodarjenje a hospodarskosć priwatnych solarnych připrawow.