Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady dwanaće wobdźělnikow wuknje zhromadnje w tak mjenowanym rěčnym hnězdźe. Přichodny čas jich w našim wječorniku předstajimy. Franziska Hauptmann chce, zo dale a wjace ludźi serbsce rěči.

Rěkam Franciska, bydlu w Budyšinje a sym so na serbskeho muža wudała. Naju tři dźěći chodźa do serbskeje pěstowarnje respektiwnje šule a wotrostu dwurěčnje. Dokelž mój mandźelski z dźěćimi serbsce rěči, přeco zaso jednotliwe słowa nawuknu. Tež dweju rěčneju kursow dla mam zakładne znajomosće serbšćiny. Tak zwjetša znajmjeńša rozumju, wo čo w rozmołwje dźe. Ale, zo sama serbšćinu nałožuju a swobodnje rěču, to je mi ćežko. Zadźěwki su prosće přewulke – ze swojimi rudimentarnymi znajomosćemi serbšćiny so derje rozmołwjeć njemóžu.