Ralbicy (MČu/SN). Stajnje prěni kónc tydźenja septembra Ralbicy wožiwja. Potom swjeći wjes babylěćo. Podawk charakterizuja zhromadnosć, tradicija a žiwjenska radosć. Lětsa spominachu na 777. róčnicu prěnjeho naspomnjenja wsy.

Swjedźeń zahajichu pjatk z tradicionalnym wubědźowanjom wohnjowych woborow, na kotrymž so dźewjeć woborow wobdźěli. Na kóncu zawěsćichu sej kameradojo ze Salowa prěnje městno před wobornikami z Debricy/Wysokeje a Sulšec. Wječor bě stan wulke rejowanišćo jako DJjojo „systemfehler & LEDZIBEATZ“ masy zwjeselachu.

Nalada bě tež sobotu wječor přewšo dobra. Kóždolětny wječorny program, kotryž wjesna zhromadnosć wuhotuje, přićahowaše tójšto ludźi. „Cyły stan bě połny ludźi“, rozprawja Christoph Wowčerk jako jedyn z hłownych organizatorow a čłon wjesneho towarstwa Ralbicy z.t. Wjace hač 30 ludźi – najmłódši ­wobydlerjo, młodźina kaž tež starša generacija – skutkowaše w programje sobu. Christoph Wowčerk wjeseleše so nad zwjazanosću: „Móžachmy so na wšitkich spušćeć. Wot mnohich ludźi žnějachmy wjele dźaka a chwalby.“