We Wojerecach wjesela so na wulki swjedźenski kónc tydźenja z tójšto poskitkami

Wojerecy (AK/SN). Za saksku krajnu domchowanku wot 12. hač do 14. septembra we Wojerecach předleži wobšěrny wěstotny koncept. Něhdźe pjeć razow telko wěstotnych sobudźěłaćerjow hač hewak na měšćanskich swjedźenjach kónc tydźenja zasadźa, praji měšćanosta za kulturne a socialne Měrko Pink. „Na domchowance wobdźěli so wjace hač 40 towarstwow a kulturnych skupin, wjace hač 80 gastronomow kaž tež wjace hač 70 wikowarjow“, doda Dirk Rolka z Łužiskeje hale.

W Janskej cyrkwi je nětko 25 žnjenskich krónow a wěncow z cyłeje Sakskeje. Wone wobdźěla so na wubědźowanju wo najrjeńšu žnjensku krónu. „Jury ­posudźuje po krutych kriterijach. Tak dyrbja kłosy we wěstym směrje wjazane być“, rozłožuje jednaćelka Sakskeho zwjazka wjesnych žonow Heike Sparmann. Najrjeńšu žnjensku krónu budu njedźelu w swjedźenskim ćahu prezentować. Wón startuje w 13 hodź. při Janskej cyrkwi. 700 sobuskutkowacych so w 38 wobrazach wobdźěli. Čara powjedźe přez torhošćo po Tešenskej dróze a Einsteinowej hač na Budysku aleju.