Projekt SorbIT njese z wosebitej akciju kulturne herbstwo do přichoda

Slepo (SN/MiP). „Kak móžu tradicionalne płaty serbskeje narodneje drasty dźensa na nowe wašnje wužiwać?“ – Tute prašenje steji w srjedźišću noweje akcije, za kotruž wabi tele dny projekt zarjadniskeho zjednoćenstwa Slepo „SorbIT! Serbska inowacija přez tradiciju“ zhromadnje ze Slepjanskim Serbskim kulturnym centrumom (SKC). 1. oktobra ju z dźěłarničku pod hesłom „Duch časa w cwornje“ w rumnosćach SKC zahaja. „Zarjadowanje pak njeje klasiski kurs za šiće. Město toho chcemy wobdźělnikam kreatiwne nastorki dać, kak móža swójske ideje wuwiwać, kotrež potom w běhu šěsć tydźenjow doma samostatnje zrealizuja“, powěda Saskia Brosius, sobudźěłaćerka SorbIT a koordinatorka akcije w rozmołwje ze Serbskimi Nowinami. „Z poskitkom měrimy so na zajimcow, kotřiž maja šijawu doma a z njej tež derje wobchadźeć wědźa“, wona znazornja.