Anett Pötschke so Koslowčanam do wólbow wjesnjanostki předstajiła

Njeswačidło (SN/CeK). Je krótko po 17 hodź. jako něhdźe dźesać wobydlerkow a wobydlerjow do domu wjesneho towarstwa we Koslowje zastupi. Mnozy z nich přińdu hnydom wot dźěła a rěča wo podawkach wšědneho dnja. Mjez nimi je tež Anett Pötschke, kotraž so wo zastojnstwo wjesnjanostki požaduje. 47lětna čaka napjata na dalšich wobydlerjow. Kóždemu da ruku a předstaji so přećelnje. Tak je hižo spočatnje jasnje, kak wječor wotběži: wotewrjeny a sprawny.

Pötschke bydli w Šešowje, pochadźa z Łomska, je ženjena a ma wosomlětnu dźowku. Maturowała je wona w lěće 1996, po tym je so na optikarku wukubłała. 2004 złoži swoje mišterske pruwowanje a dźěła dale pola Apollo. W lěće 2015 so wona zesamostatni a załoži swójsku firmu: „die Sehfahrer“. Tuta swjeći lětsa swoje dźesaćlětne wobstaće. 2019 dósta wona próstwu gmejnskeho radźićela, zo njech do Njeswačanskeje gmejnskeje rady zastupi. Hnydom w prěnich wólbach so wona do gmejnskeje rady­ woli a je tam nětko hižo šěsć lět aktiwna.­