Budyšin (SN). Wokrjesny sejmik Budyskeho wokrjesa je wčera na swojim posedźenju Tomaša Korcha za noweho hłownohamtskeho społnomócnjeneho za serbske naležnosće we wokrjesu Budyšin powołał. Konječan skutkuje jako wěcywobdźěłar w jobcenteru a přewza městno wot jutřišeho z podźělom 19,5 hodźin wob tydźeń. Wokrjesnym radźićelam wón wčera připowědźi, zo chce nowe serbske ideje přesadźić a internetnu stronu Budyskeho wokrjesa ze serbskimi wobsahami pjelnić. Dale chce, zo njech wobydlerjo a towarstwa stajnje jeho narěča, jeli maja problemy abo prašenja.

38lětny je fachowc w zarjadnistwje. W swojim wólnym času wón přewšo rady rejuje a je tuž jako Delan sobustaw w Smjerdźečanskej rejowanskej skupinje. Tomaš Korch posudźuje so sam jako wjesołeho, porjadneho a sebjewědomeho. Z tym je wón wčera tež radźićelow wokrjesneho sejmika přeswědčił.