ST Zemicy-Tumicy –

Sokoł Ralbicy/Hórki 0:7 (0:4)

Zestawa hosći: Schöne – P. Šołta, B. Heidorn, Matka, L. Heidorn, B. Bejma, Gloxyn, Mikławšk (J. Šołta), Hicka (46. Korjeńk), N. Šnajder (72. Žur), R. Šnajder

We wosmifinalu su Sokoljo znowa přećiwo zastupnistwu z wokrjesneje klasy hrali. Tuž běchu dwě klasy wyše hrajacy hosćo jasny faworit. Ralbičenjo na hrajnišću tež hnydom wotežki do rukow wzachu a hru jasnje kontrolowachu.

Traješe hač do 28. min., doniž prěni raz we wrotach hosćićela njezaklinka. Tim Hicka bě so na prawej stronje hač na zakładnu liniju přesadźił a Niklasa Šnajdera posłužił, kotryž do dołheho róžka přetwori. Richard Šnajder trjechi w druhim pospyće k 0:2 (32.) a krótko po tym pósła škitarja Michała Matku směr wrota, kotryž mudrje třeći wuspěch partije docpě (37.). Po krótko wuwjedźenym róžku wotzamkny kapitan Denny Gloxyn wuspěšnje z kromy šěsnatki do krótkeho róžka. Ze změrowacym předskokom 0:4 dźěše tuž do kabiny.