„Tajke něšto hišće ženje njemějachmy“, praješe wliwapołny zastupjer Budyskeje CDU, kotryž runja wšěm druhim wězo nochce, zo jeho citujemy. Zwada na čole měšćanskeho zarjadnistwa zjawnosć jima.

Budyšin (SN/mb). Radio Lausitz je wčera w powěsćach připosłucharjow wo wotkryću našeho wječornika informowało. Póndźelu a wutoru běchmy wo tym pisali, što je so tydźenja srjedu na njezjawnym posedźenju měšćanskeje rady sprjewineho města stało: Měšćanosta dr. Robert Böhmer (bjezstronski) je radźićelow namołwił, proces wotwolenja wyšeho měšćanosty Karstena Vogta (CDU) zahajić abo jeho, Böhmera, wotwolić. To je z jeho wida jeničke rozrisanje, dokelž takle njemóže dale hić. Wón je frakcijam rozmołwu poskićił. Dźens rano su tež Sakske Nowiny (SZ), wo tym „mjeztym zjawnym potajnstwje“ pisali, dotal jenož online. W interviewje wo „eklaće za za­wrjenymi durjemi“ wyši měšćanosta Karsten Vogt swój wid rozłožuje. Wón při­znawa, zo je to njewšědny a wšěch sobudźěłaćerjow w radnicy wužadowacy po­dawk był.