Wojerecy (SN/MWj). W nutřkownym měsće Wojerec zarjaduja tuchwilu nowy wodźenski system za pěškow. Wón ma stare pućniki z lěta 1998 narunać, kotrež su lětsa w septembru wottwarili. Za nowy wodźenski system su spěchowanske srědki ze zwjazkoweho programa „Do přichoda kmane nutřkowne města a centry“ dóstali.

Wojerowčenjo buchu při wuwiću noweho systema sobu zapřijeći. Na měšćanskej platformje za sobuskutkowanje móžachu wobydlerjo pokiwy na kmane městna a za bjezbarjernosć zapodać. Tež wo wuhotowanju móžachu ludźo wothłosować. Za to mějachu štyri namjety na wuběr. Wothłosowanje bě digitalnje kaž tež analognje móžno. Nimo toho su so pasantow při informaciskim stejnišću na Łužiskim naměsće za jich měnjenjom prašeli a nastorki přijimowali. Dohromady je so na wothłosowanju 263 wosobow wobdźěliło. Nětko zwoprawdźa namjet, kotryž bě při tym jasnu wjetšinu hłosow dóstał.