Čorny Chołmc/Němcy (AK/SN). Młodźinskej klubaj w Čornym Chołmcu a Němcach stej dwaj z cyłkownje dźewjeć dobyćerjow wubědźowanja „Młodźina region pohibuje“. Organizowało bě je ­Towarstwo za wuwiće wsow we łužiskej jězorinje. Kóždy z dobyćerjow dóstanje tysac eurow. W Čornym Chołmcu chce towarstwo pódlanski rum z čerstwej barbu porjeńšić kaž tež z nowymi meblemi wuhotować. W Němcach přewjeduje młodźinski klub hižo 30 lět hudźbny festiwal „Wjesny rock“. Z dobytymi tysac eurami wurunaja wudawki lětušeho zarjadowanja.

W juniju su wubědźowanje zahajili. „Spočatnje je trochu pomału šło, dokelž bě jenož mało zajimcow“, powěda předsyda organizowaceho towarstwa Dietmar Bär. Tohodla su so na wjesnych předstejićerjow Leaderoweho regiona łužiskeje jězoriny wobroćili a za wubědźowanje wabili. Mjez wšitkimi zajimcami móžachu cyłkownje 10 000 eurow rozdźělić, tuž dósta kóždy z dźewjeć kandidatow tysac eurow.