Hamor (AK/SN). W přichodnych 15 lětach chce Hamorska gmejna wjesne srjedźišćo w Hamorje porjeńšić a ponowić. Za to prócuja so wo spěchowanje z programa Zwjazka a krajow „Rozrost a naslědne ponowjenje – žiwe kwartěry wuhotować“. Na wčerawšim posedźenju ­radźićeljo jednohłósnje wobzamknychu, trěbne podłožki za to zapodać. „Naj­pozdźišo 12. decembra dyrbimy Sakskej natwarnej bance wšitke dokumenty sposrědkować. Hač dosrjedź lěta 2026 so rozsudźi, hač spěchowanje dóstanjemy“, rjekny wčera Daniel Paul z Lipšćanskeho běrowa Němskeje towaršnosće za wu­wiwanje městow a ležownosćow (DSK), kiž je loni wuwićowy koncept za Hamorske wjesne srjedźišćo zdźěłała. Jeli Sakska natwarna banka spěchowanje přizwoli, přidatej Sakska a Zwjazk za jednotliwe naprawy stajnje pjeć milionow eurow. Komuna sama dyrbjała dalše pjeć mi­lionow eurow zapłaćić. Cyłkownje móhli potajkim 15 milionow eurow inwes­tować.