Před Wojerowskej Łužiskej halu wuměłsku skulpturu wotkryli

Wojerecy (KD/SN). Bronzowy hórnik, kotrehož su minjeny pjatk na Wojerowskim Łužiskim naměsće wotkryli, wupada, jako chcył wopytowarjow z „Wam k zbožu“ strowić. Jeho ruka pokazuje na naddimensionalny brunicowy briket, na kotryž móža so ludźo posydnyć. Hórnik je so swoje dźěłowe črije zuł, dokelž so čas hórnistwa we Łužicy nachila. Nětko hlada napjeće do noweho přichoda, wopisowaše wuměłc Ubbo Eninga z Berlina swoju twórbu, kotruž bě w běhu minjenych dwanaće měsacow stworił.

„Briket jako ławka a postawa hórnika hódnoćitej dźěło mnohich generacijow hórnikow a wšitkich ludźi, kotřiž su čas žiwjenja za wuwiće města Wojerecy dźěłali“, rjekny dr. Günter Seifert, bywši zastupowacy generalny direktor płunokombinata Čorna Pumpa. Zakładny kamjeń kombinata běchu w lěće 1955 runočasnje z tym noweho dźěla Wojerec połožili.