Sedmy raz wotmě so w sportowni Budyskeho­ powołanskošulskeho centruma­ abi-cup přichodnych maturantow Sprjewineho města we wolejbulu. Prěnje mustwo Serbskeho gymnazija Budyšin (SGB) je turněr, na kotrymž wobdźěli so wosom cyłkow, bjez poražki dobyło. Druhe mustwo serbskeho kubłanišća wobsadźi 8. městno.

Minjenu srjedu witaše zastupowaca šulska nawodnica Budyskeho powołanskošulskeho centruma Manja Seidel šulerjow 11. do 13. lětnika w tamnišej sportowni na tak mjenowany abi-cup.

Wosom­ wolejbulowych cyłkow, wobstejacych z dweju holcow a štyrjoch hólcow, wojowaše sedmy raz wo pućowanski pokal. Sportowče a sportowcy Serbskeho gymnazija běchu wosebje motiwowani, wšako chcychu wuspěch minjeneju lět bywšich sobušulerjow wospjetować, a sej pokal za přeco zdobyć. W lěće 2023 wjeselachu so maturanća SGB z kapitanom Eliasom Kummerom nad wuspěchom a loni radowachu so nad nim dwanatkarjo wokoło Benedikta Šołty.