Towarstwa, iniciatiwy a wobydlerjo Radworja wusko hromadźe dźěłaja

Radwor (SN/BŠe). Towarstwa, iniciatiwy a wobydlerjo z Radworja přihotuja so hižo dlěje na cyle wosebite zarjadowanje. Njedźelu, 14. decembra, zarjaduja „Adwent­ na dworach“. „Ideju smy na zhromadnych zeńdźenjach towarstwow a iniciatiwow zrodźili, kotrež w Radworju prawidłownje přewjedujemy“, rozkładźe předsydka towarstwa Radworske dwórnišćo inkluzije Raphaela Wićazowa. Loni bě towarstwo Radworskeje kupy hišće adwentne wiki organizowało. Čłonojo towarstwa pak su signalizowali, zo tole wobšěrnych přihotow dla hižo njezmištruja. Na swojim zeńdźenju w januaru su wo tym rěčeli a zdobom ideju za nowy format nastorčili.

Prěni namjet bě, adwentne wiki z towarstwami jenož na nawsy wuhotować. Tola městnosć runjewon optimalna njeje a tuž zrodźichu akterojo mysličku, zarjadowanje na wjacore dwory rozdźělić. Sydom městnosćow jich cyłkownje je a kóžda z nich ma swójski wobšěrny program předwidźany. Po wsy pućujo móža sej wopytowarjo wšě poskitki wotkryć.