Njejasnosćow dla wobzamknjenje z dnjoweho porjada šmórnyli

Trjebin (AK/SN). Dobrowólna wohnjowa wobora Trjebina ma nowu zwučowansku čaru za wohnjowoborny sport dóstać. Wona ma w sportowym kompleksu na něhdyšim kopanišću nastać. Wo tym su sej gmejnscy radźićeljo poprawom přezjedni. Přiwšěm woni na swojim wčerawšim posedźenju wobzamknjenje wo tym přestorčichu.

„Je hišće wjele njejasnosćow a wote­wrjenych prašenjow“, rjekny radźićel Christian Struck. Konkretne prašenja pak wón njemjenowaše. „Předłoha njeje do­zrawjena.“ Bywši nawoda gmejnskeje wohnjoweje wobory a dźensniši radźićel Bernd Kowalick měnješe, zo dyrbja wo zwučowanišću hišće rěčeć. Tohodla měło so wobzamknjenje přestorčić. Wjesnjanosta Robert Sprejz (njestronjan) bě zadźiwany, wšako běchu wobornicy sami tajku zwučowansku čaru namjetowali.