Beneficny wječor w Budarjec bróžni z nahladnym wunoškom

Jaseńca (LMC/SN). Beneficny koncert z hudźbu a dobrej naladu a połny wutrobitosće – tak prezentowaše so minjenu sobotu wosebite zarjadowanje w swjedźensce wupyšenej bróžni Budarjec swójby w Jaseńcy. Wulki stan skićeše ­přidatne městno, přetož zarjadowanišćo bě spěšnje nimale hač na poslednje městno pjelnjene. Něhdźe 150 wopytowarjow bě sej do Jaseńcy dojěło, zo bychu na hudźbu słuchali a rjanu atmosferu dožiwili.

Prěni dźěl programa wuhotowaštaj Syman Hejduška a Helena Brězan-Hejdušcyna. Z wotměnjawym repertoirom, ­kotryž sahaše wot serbskich spěwow hač k jendźelskim klasikarjam, duwo publikum jimaše. Wo ćopłotu we wutrobach a wo swjedźensku atmosferu postaraštaj so z adwentnym spěwom. Přeco zaso wuměłcaj publikum aktiwnje zapřiještaj. Mjez druhim připosłucharjow namołwještaj, melodije ze zynkami wudo­społnić. Tak nasta jónkrótny zwukowy ­wobraz.