Multimedialny přewodnik informuje wo serbskich wosebitosćach
Pančicy-Kukow (SN/MWj). Wot wčerawšeho móža so wopytowarjo klóštra Marijina hwězda w Pančicach-Kukowje a gmejnow zarjadniskeho zwjazka Při Klóšterskej wodźe z pomocu šmóratka a interneta wo stawizniskim wuwiću a dźensnišim žiwjenju kaž tež wo serbskich wosebitosćach teritorija wobhonić. Za to je w minjenych 18 měsacach digitalny a multimedialny informaciski a wodźenski system pod hesłom „Marijina hwězda inowatiwnje“ nastał. Wčera su projekt zakónčili a wuslědk zjawnosći předstajili. Hłowni akterojo běchu Kruh přećelow Marijineje hwězdy, zarjadniski zwjazk kaž tež předewzaće z Bremena, kotrež je projekt technisce zwoprawdźiło.
