Poslednje hodźiny stareho a prěnje noweho lěta kóždy na swoje wašnje dožiwja. Naša swobodna awtorka je so w Budyšinje rozhladowała, kak ludźo tule stare lěto rozžohnowachu, nowe lěto witachu a kak ze silwesterskimi praskotakami wobchadźachu.
Silwester je so za mnohich Budyšanow hižo jara zahe započał, mjenujcy 29. decembra. Tón dźeń započachu tu kaž wšudźe druhdźe w kraju praskotaki předawać. Někotryžkuli njemóžeše dočakać a hižo samsny wječor praskać započa. A přichodny dźeń respektiwnje w nocy na to móhł sej čłowjek myslić, zo je silwester tónraz zašo.
Porno tomu bě w běhu 31. decembra najprjedy raz trochu měrnišo. Wodnjo je so rjenje sněžiło, wječor pak bě wjedro skerje mokre, wětřikojte a zymne – žane idealne wuměnjenja to za silwesterske praskanje. Tak bě hodźinu do połnocy na hasach a naměstach poměrnje mało ludźi, štož snano tež na zdźěla hładkich pućach a chódnikach zaležeše. Něchtóžkuli sej radšo do jednoho z hosćencow wućekny abo dźěše do Dźiwadła na hrodźe, hdźež so silwesterski swjedźeń wotmě. Wulki dźěl hosćencow w starym měsće pak njebě wočinjeny.
