Wot spočatka tohole lěta je Juliana Macalina (njestronjanka) wjesnjanostka w gmejnje Njeswačidło. Swoje nowe zastojnstwo wobhladuje wona skerje jako šansu dyžli jako wužadanje.

Njeswačidło (JK/SN). Po tym zo je dotalny Njeswačanski wjesnjanosta Gerd Schuster (CDU) swoje zastojnstwo loni złožił, běchu tam wólby noweho wjesnjanosty zarjadowali. W druhim wólbnym kole bu Juliana Macalina jako nowa wjesnjanostka wolena. Wona dósta 380 z móžnych 700 hłosow. W kruhu jeje swójby wjedźechu tón čas někotružkuli chutnu rozmołwu. Skónčnje zhromadnje rozsudźichu: „Ty to činiš, ty to móžeš!“ Mać třoch dźěći je swoje zastojnstwo w dobje nastupiła, w kotrejž ma so gmejna znowa wusměrić a swoje naležnosće zaso do prawych kolijow zwjesć.

W rozmołwje ze Serbskimi Nowinami je wona cyle jasnje zwurazniła, zo wobhladuje swoje nowe dźěło skerje jako šansu dyžli jako wužadanje. Wona ma krutu wolu, nadawki, kotrež před njej steja, rozrisać. Za to ma młoda žona wšitke trěbne wuměnjenja, kaž sama praji. Je w hospodarstwje nazhonjenja zběrała, je zaměrna a wobrotniwa a zamóže so derje zwuraznić.