Na slědach železniskeje čary mjez Budyšinom a Wojerecami

Radwor/Njeswačidło/Rakecy (UM/SN). W januaru lěta 2001, potajkim před 25 lětami, je posledni nakładny ćah wot Budyskeho dwórnišća do Kamjenjanskeje kaolinownje pola Rakec jěł. Hižo w meji 1999 pak bě mjez Budyšinom a Wojerecami posledni wosobowy ćah jěł. 31. meje 2002 su čaru doskónčnje zawrěli. To bě takrjec rozžohnowanje krok po kroku. Mnozy Budyšenjo a wobydlerjo wsow sewjernje sprjewineho města běchu wusko z čaru zwjazani. Wostrózbnjenje bě tuž wulke, jako buchu plany znate. 1997 bě hišće rěkało, zo „ma so pruwować, hač hodźi so čara dale wužiwać“. W lěće 1999, ze změnu jězbneho plana, je wobchadny zaměrowy zwjazk ZVON železniski wobchad zastajił. Wšitke prócowanja, čaru wožiwić, zwrěšćichu. Poněčim so kolije, zawěry a techniske připrawy zhubichu.