Budyšin (SN/MWj). Infrastrukturu za nabiwanje elektroawtow Budyske měšćanske zawody EWB dale wutwarjeja. Kaž w nowinskim zdźělenju rěka, móža wobsedźerjo z milinu ćěrjenych awtow nětko nowej nabiwanskej staciji na Budyskim Třělnišću wužiwać. Tutej su w bjezposrědnjej bliskosći tamnišeje sportoweje hale natwarili. Při kóždej móžetej dwě awće runočasnje milinu tankować. Dohromady steja potajkim štyri nabiwanske městna k dispoziciji. Kaž w nowinskim zdźělenju dale rěka, poskićuja wšitke městna stoprocentowsku eko-milinu. Kak so milina dokładnje produkuje a zwotkel wona pochadźa, z informacije njewuchadźa.

Syć nabiwanskich stacijow w sprjewinym měsće w zamołwitosći měšćanskich zawodow z tym dale rozrosće. Po stejnišćach na parkowanišću při Schliebenowej, na parkowanišću „Króny“ a w parkowanskim domje při dźiwadle je to nětko štwórte swójske městno EWB, hdźež móža šoferojo awto nabiwać. Na Třělnišću su nabiwanišćo tak koncipowali, zo hodźi so wone po potrjebje wo dwě dalšej staciji rozšěrić.