Kamjenc (SN/MWj). 15 dźěći je so w Kamjenskej chorowni swjateho Jana hač dosrjedź januara narodźiło a dalše su so minjene dny přidružili. To je po słowach dr. Pavela Rubeša, šeflěkarja kliniki za gynekologiju­ a porodnu pomoc přewšo dobry start do lěta 2026. Přičina za wozjewjenje tuteje dobreje powěsće je, zo so w zjawnosći wopačne informacije šěrja: Hinak hač so mjez wobydlerjemi tuchwilu powěda, njeje žanych planow abo samo wobzamknjenjow, porodnu kliniku zawrěć, rěka w nowinskim zdźělenju chorownje. Porodna pomoc a gynekologija w Kamjencu dale wostanjetej.

Z wobstajnje wjace hač 300 porodami wob lěto je Kamjenska porodna stacija kruty wobstatk regionalneho lěkarskeho zastaranja. Tale ličba je so zašłe lěta lědma změniła. Medicinske zastaranje maćerjow a dźěći je tež z tym zaručene, zo so tež dźěćacy lěkarjo wobstajnje wo małych­ pacientow staraja. Za to wusko z Drježdźanskim měšćanskim klinikumom hromadźe dźěłaja.