W mnohich pěstowarnjach woblubowany zymski nałožk haja

Radwor/Pančicy-Kukow/Wotrow (SN/MWj). Po cyłej Hornjej Łužicy su w zakładnych šulach a pěstowarnjach minjene dny a dźensa ptači kwas swjećili. Zašłe tydźenje su holcy a hólcy pilnje za program zwučowali, kotryž nětko staršim, dźědam a wowkam předstajichu. Njeličomne hotowarniče su kubłarkam pomhali, dźěći serbsku narodnu drastu woblec.

W Radworskej „Meji“ je pjatk pjatnaće předšulskich dźěći katolskeho dźěćaceho domu „Alojs Andricki“ w nošerstwje katolskeje wosady jako serbski kwasny ćah na jewišću stało. Njewjesta bě Tamina Wićazec, nawoženja Tim Mejn a braška Beno Šnajder. Něhdźe sto wopytowarjow dožiwi pisany program a jón ze sylnym přikleskom mytowaše. Kubłarka Claudia Hejdušcyna bě program z dźěćimi nazwučowała, Marko Njek jón na key­boardźe přewodźeše. Po programje su so dźěći w swojich pyšnych drastach fotografować dali.