Budyšin (CS/SN). Fala wuslěkaneje serbskeje narodneje drasty njenapadnje jenož swojeje pisanosće dla, ale tež toho­dla, dokelž je horjeka na wosebite wašnje do fałdkow kładźena. W delnim dźělu fale so jednotliwe fałdy wočinja. Čłowjek móhł sej myslić, zo su tele fałdy z někajkej mašinu zhotowjene, přetož su jara wobstajnje zešite. Ale mašina tole zdokonjeć njezamóže. To je ryzy ručne dźěło. Technika mjenuje so smokowanje. Minjeny pjatk su zajimowane žony a holcy w dźěłarničce w Budyskim Serbskim domje techniku zeznali a so praktisce z njej zaběrali.