Ralbičanscy šulerjo wuknu w zymskim lěhwje sněhakować

Altenberg (JR/SN). 21 wuknjacych 8. lětnika Serbskeje wyšeje šule Ralbicy přebywa tutón tydźeń w zymskim lěhwje w Altenbergu. Pod nawodom wučerjow Maksimiliana Krala-Zahrodnika, Jana Rjedy a rjadowniskeje wučerki Franciski Wróbloweje wuknu delanscy šulerjo alpinske sněhakowanje. Započatkarjo wuknu wěsće na deskach stać, borzdźić a křiwicy jěć. W skupinje pokročenych filuja na technice a na prawym zasadźenju kijow.

Wčera, srjedu, wotkrychu sej Ralbičenjo montanowu kónčinu UNESCO. Wučerka Franciska Wróblowa jim wosebitosće UNESCO-regiona zbliži. Mjez druhim wopytachu Altenbergsku bobowu čaru. Tam trenuja cyły tydźeń mjezynarodni dorostowi sportowcy za swětowe mišterstwa w sankowanju, kiž so tam kónc tydźenja wotměja. Někotři z nich přebywaja runje tak kaž Ralbičenjo w młodowni swójby Weinbergec w Altenbergu. Tuž zetkachu Ralbičanscy šulerjo sportowcow z Taiwana, Jendźelskeje, ­Rumunskeje, Słowjenskeje, Awstriskeje a Ukrainy a dožiwichu trening direktnje w prěnim rynku při čarje.