Wojerecy (AK/SN). Město Wojerecy ma šesty raz etat za wobydlerjow. 75 000 eurow móža w měsće samym wudać a dalšich 5 000 eurow w kóždym z wjesnych dźělow. To su Brětnja-Michałki, Němcy, Hórnikecy, Čorny Chołmc a Ćisk. Wutoru su měšćanscy radźićeljo tole jednohłósnje wobzamknyli. Ideje wobydlerjow, za čo pjenjezy nałožować, swědča wo tym, zo chcedźa sami k polěpšenju žiwjenskeje kwality přinošować, praji nawoda dźěłoweje skupiny za wobydlerski etat Uwe Blazejczyk. We Wojerecach wuhotuja wobydlerski centrum Piwarska haska 1 wonka z nowymi móžnosćemi k sedźenju, štož płaći 15 000 eurow. 7 000 eurow je za młodźinski festiwal rezerwowanych. W Kinajchće nastaja nowe ławki, w měsće pak sportowe nastroje, kotrež smě kóždy wužiwać.