Wobzamknjenje měšćanskeho etata tež Kamjentny dom potrjechi

Budyšin (SN/MiR). Z etatom města Budyšina maja tuchwilu hospodarski a politiski problem. Měšćanska rada je drje naćiskej za lětuši etat přihłosowała. Ale dochody trochuja na něhdźe 101,9 milionow, wudawki na 115,7 milionow eurow, z toho wurosće strukturelny deficit. Rezerwy maja etat wurunać. Do toho běchu tabulku z namjetami radźićelow za lutowanske naprawy wotdźěłali. W njej mjez druhim steji, městno za młodźinske socialne dźěło w štwórći Strowotna studnja šmórnyć a srědki za Kamjentny dom na sumu spěchowanja w lěće 2025 za přichodne lěta wobmjezować. Přičiny stupacych wudawkow města su na přikład inflacija, předpisane zwyšenje standardow a přidatnje přenjesenje nadawkow z boka kraja Sakskeje.

Budyska syć tvBUNT reaguje z njezrozumjenjom na rozsud, streetworkera w Strowotnej studni hižo njefinancować. „Jeničce ze spušćomnym přewodom móže streetwork skutkownje před prawicarskoekstremnym wliwom škitać a žiwu demokratisku alternatiwu pokazać“, zdźěli rěčnik iniciatiwy Christian Schäfer.