Na swojim posedźenju tydźenja wutoru su so Wojerowscy měšćanscy radźićeljo mjez druhim z přichodom Stadiona Friedricha Ludwiga Jahna zaběrali. Nimo toho su sumu powitanskeho dara za nowonarodźene dźěći znižili.
Wojerecy (AK/SN). Město Wojerecy chce Stadion Friedricha Ludwiga Jahna w přichodnych měsacach wobšěrnje saněrować. Přidatnje k hižo schwalenemu spěchowanju z Europskeho fondsa za regionalne wuwiće (EFRE) požada so město nětko wo spěchowanje ze zwjazkoweho programa „Saněrowanje komunalnych sportnišćow“. Cyłkowna trěbna suma za dalše naprawy wučinja něhdźe milion eurow. Wojerowscy zamołwići nadźijeja so na 75 procentow spěchowanja. Za město Wojerecy pak to tež rěka, zo ma dohromady 250 000 eurow swójskeho podźěla zwjesć. Na swojim posedźenju minjenu wutoru je Wojerowska měšćanska rada jednohłósnje požadanje wo spěchowanske srědki Zwjazka wobzamknyła.
