Z namjetom w krajnym sejmje nadběhuje nošerjow myta „Čiń sobu!“

Drježdźany (SN/mb). Wubědźowanje wo pjenježne mytowanje projektow pod hesłomaj kaž „čiń sobu!“ a „simul+“ hižo wjacore lěta tež čestnohamtskemu angažementej za serbšćinu w zjawnosći tyje. Najsylniša frakcija opozicije w Sakskim krajnym sejmje – AfD – pak je so rozsudźiła, tajke wubědźowanja skandalizować: Je parlamentej zapodała namjet (ćišćenku 8/5071 w internetnym informaciskim systemje sejma, edas, z kotrymž nawjazuje na kritiski wotum krajneho zličbowanskeho zarjada w jeho lońšej rozprawje. Zašły kónc tydźenja je so „Hornjołužiski kurěr“ we wulkim nastawku polemice AfD a prašenju „Kak póńdźe dale ze Simul+?“ wěnował. Na to je statne ministerstwo za infrastrukturu a wuwiće kraja hižo w stejišću k namjetej AfD wotmołwiło: W srjedźišću wubědźowanja lětsa budu młodźi ludźo we wjesnych kónčinach stać.