Njebjelčan wědomostnik chce projekt „Perma & kultura“ zwoprawdźić

Njebjelčicy (SN/MiR). Hižo wjacore lěta chce geologa Thomas Noack we Łužicy centrum permakultury załožić. Prěnje ideje a tež planowanja za njón předleža. Předwidźany běše centrum na kromje Miłoćic, njedaloko Miłočanskeje žaby. To pak so na kóncu jako idealne stejišćo za tajki priwatny zaměr wopokazało njeje. Noack – we Łužicy a zwonka njeje znaty jako fachowc za přepytowanje twarskeje pódy pod aspektomaj hustoty kaž tež kmanosće zasakowanja wody – pyta hižo dlěje za přihódnej imobiliju za swoju ideju. „Poprawom scyła tak ćežko njeje, tajku namakać. Mnozy dźě chcedźa swój tři- abo štyristronski statok předać“, wón powěda. „Wo wjele ćešo je, imobiliju z polom w bliskosći namakać.“ Te pak wón trjeba, zo móhł swój koncept wo priwatnym kulturnym a permakulturnym centrumje zwoprawdźić. Wšako chce Noack po ekologiskich principach dźěłać, kotrež staj Awstralčan Bill Mollison a Awstričan Sepp Holzer wuwiłoj. Wjesnjanosća, kotrychž je hižo narěčał, jemu dotal pomhać njemóžachu.