Z programom za ponowjenje městow chcedźa naprawy zwoprawdźić

Kulow (AK/SN). W přichodnych lětach móhło město Kulow hač do wosom milionow eurow spěchowanskich srědkow z programa za ponowjenje městow dóstać a tak najwšelakoriše twarske naprawy w srjedźišću města zwoprawdźić. „Wjace hač milion eurow je hižo přizwoleny. Za dalše srědki dyrbimy kóžde lěto próstwu zapodać“, rozłoži projektowy nawoda Martin Neumann z Drježdźanskeho planowanskeho běrowa STEG wčera na posedźenju měšćanskeje rady. Hromadźe ze swójskim podźělom města móhli po wšěm zdaću hač do dwanaće milionow eurow inwestować. Spěchować hodźa so naprawy na terenje wot zakładneje a wyšeje šule přez torhošćo hač ke Kolpingowemu naměstu a hač k Staremu dwórnišću.