EVSE planuje pola Mučowa nowu płunowu staciju

Kulow (AK/SN). Energijowy zastaraćel Čorny Halštrow (EVSE) chce lětsa pola Mučowa nowu płunowu staciju natwarić. Tole zdźěli předewzaće na zašłym posedźenju Kulowskeje měšćanskeje rady. Inwestować chcedźa něhdźe 800 000 eurow. Naprawa bě hižo wjacore lěta předwidźana. „Areal pak bě wot wulkeje wody potrjecheny. Po saněrowanju při Čornym Halštrowje tale kónčina nětko hižo w kartach za wulku wodu zapřijata njeje. Tuž móžemy projekt zwoprawdźić“, praji techniski nawoda EVSE Henry Tillack.

Předewzaće je w nowembrje 1990 nastało. Dźensa zastaruje wone 60 wjeskow a městow we Łužicy z płunom. Ze 17 sobudźěłaćerjemi je energijowy zastaraćel ze sydłom w Salowje jedne z najwjetšich předewzaćow w Kulowje a wokolinje. Na nim wobdźělene su nimo Kulowa wjacore komuny jako towaršnicy, mjez druhim gmejnje Ralbicy-Róžant a Njebjelčicy. W Kulowcu wudźeržuje předewzaće staciju, hdźež móžeš běžity płun kupić. Póndźelu, wutoru a štwórtk ju rentnar Hans-Ulrich Glas wočinja a kupcow posłužuje.