Zjawne wodźenje po wustajeńcy Budyskeho Měšćanskeho muzeja a debjenje jutrownych jejkow w Kamjencu stej poskitkaj, ­kotrejž we wobłuku akciskich tydźenjow za žony Budyskeho wokrjesa na serbske žiwjenje skedźbnjatej.

Budyšin (SN/MiR). Cyły měsac połny mnohotnosće, wuměny a inspiracije – takle wabja społnomócnjene za runostajenje městow Budyšina a Wojerec na mjeztym 6. akciske tydźenje žonow w Budyskim wokrjesu. Pod hesłom „Słowa so jimać. Sobu rěčeć. Jednać,“ su wšitke žony, zajimowani mužojo a zwjazkarjo na zarjadowanja přeprošeni. „Runostajenje žiwi so z wobdźělenja, mnohotnosće a zmužitosće zhromadnje po nowych pućach kročić“, tak zamołwitej pisatej. Wot 1. hač do 31. měrca 2026 wotměja so zarjadowanja, kotrež wšelakorosć žiwjenja a angažementa žonow zwidźomnjeja.