Njeswačanska fyzioterapeutiska praksa přeńdźe do młódšich rukow

Njeswačidło. 26lět je Angelika Domašcyna w Njeswačidle w susodstwje dwórnišća swoju fyzioterapeutisku praksu wjedła. Jako so wona loni srjedź decembra na wuměnk poda, to mnozy wobžarowachu, dokelž měnjachu, zo dyrbja sej ­nowu praksu pytać, hdźež móža sej fyzioterapeutisce pomhać dać. Hižo tehdy pak bě jasne, zo to scyła trěbne njebudźe, přetož praksa je mjeztym přešła do noweju rukow. Wot spočatka měrca powjedźe ju Marija Škodźina z Wotrowa.