Kulow (AK/SN). W katolskej pěstowarni swj. Marije w Kulowje ma so ličba hortowych městnow wot šulskeho lěta 2026/2027 redukować. W lěće 2022 změnjena zawodowa dowolnosć so njepodlěši. Dokelž wosebite rjadowanje wuběži, płaći potom zaso kapacita horta, kaž bě wona za pěstowarnju spočatnje planowana. „My jako starši so starosćimy, dokelž ma wot awgusta w horće 15 městnow mjenje być. Za dźěl dźěći dyrbimy hinaše zarjadnišćo pytać“, rjekny staršiski rěčnik Steffen Dučman na zašłym posedźenju měšćanskeje rady. Mnozy starši jeho ­přewodźachu.

Dučman so prašeše, čehodla njeje město dlěšodobne a za staršich znjesliwiše rozrisanje namakało. Starši běchu so wědomje za katolsku pěstowarnju jako hort za swoje dźěći rozsudźili. Nětko dyrbja někotre dźěći swój zwučeny wobswět w horće wopušćić. Kaž Dučman runočasnje přizna, wšak redukowanje hortowych městnow jenož katolsku pěstowarnju njepotrjechi, ale tež tu w nošerstwje CSB. Tam pak njejsu wuskutki tak pytnyć, dokelž maja w pěstowarni CSB tež ze zniženej ličbu městnow hišće dosć kapacity hortowe dźěći přiwzać.