Petra Wachsmann je wirus wosebiteje reje wuspěšnje rozmnožiła

Budyšin (CS/SN). Dypkownje w 17.30 hodź. přichadźeja kóždu wutoru rejowarki a jedyn rejowar do Budyskeho Serbskeho domu, zo bychu so na žurli swojej wulkej lubosći line-dance wěnowali. Jich trenarka je Petra Wachsmann, rodźena Budyšanka, kotraž ma druhe bydlenje w Berlinje a mjez woběmaj městomaj nad Sprjewju tam a sem jězdźi. Wot zažneje młodosće njemóžeše sej wona ničo druhe předstajić hač rejować. W Berlinje je wjacorych móžnosćow, so line-dancej wěnować, w Budyšinje skerje mjenje. Tohodla wuwi wona sama iniciatiwu a nadeńdźe spěšnje dosć zajimcow. Mjeztym nawjeduje Petra Wachsmann tři skupiny. „Móžach potajkim wirus tuteje wosebiteje reje wuspěšnje rozmnožić“, wona smějkotajo zwěsći. Najwažniše je wjeselo. Sobu rejować móže kóždy, wšojedne kotreje staroby, hač žona abo muž. Mužojo pak wočiwidnje dosć zastupjeni njejsu.