Ćisk (JT/SN). Serbske tradicije a nałožki hajić a zachować je Ćišćanskemu wjesnemu předstejićerjej Jensej Zahrodnikej wutrobna naležnosć. Tuž je wón sobotu wjesnych muži na zhromadne piwo přeprosył. Najwažniši dypk zarjadowanja bě, do wjesneje zhromadnosće muži přiwzać, kotřiž su loni ze swojimi swójbami do wsy přićahnyli. Něšto lět mjeztym tež muži wot 25 lět přijimuja, kotřiž drje nimaja swójbu, ale swójsku domjacnosć. Spočatnje spominachu na muži ze wsy, kotřiž běchu loni zemrěli.
Lěto 2025 bě za 932 wobydlerjow Ćiska bjez wulkich wjerškow. Přiwšěm su rjad zarjadowanjow přewjedli. Wjesny předstejićer kritizowaše, zo bu dźěl hrajkanišća w bydlenskej štwórći Při sćelaku wotstronjeny. Dale wón porokowaše, zo je ławka z motiwami serbskich powěsćow při wjesnym haće nětko jako hrajkanski nastroj zastopnjowana, štož je z přidatnym dźěłom zwjazane. Jedyn z lětušich wjerškow budźe wopyt z partnerskeje gmejny Přikazy.
